2024 чылдың апрель 18 14 Чаа орук

2024 чылдың апрель 18 № 14 «Чаа орук»

"Хөөмейимни кагбас-ла мен" мөөрей-конкурс

Тываның барыын кожууннарының школаларының өөреникчилериниң аразынга апрель 17-де Бажың-Алаакка "Хөөмейимни кагбас-ла мен" деп чылдың-на эртер мөөрей - конкурс болуп эрткен.. Он ийиги мөөрейниң кол шаңналы богба, бирги чергениң лауреаттарынга хойларны шаңналга тыпсырын суму чагыргазы, Ырлаар Маадыр-оол аттыг культура бажыңы болгаш Чөөн-Хемчиктиң культура эргелели, Чадаанада «Культура салгал байлаа» төп болгаш Бажың-Алаактан үнген Тываның билдингир хөөмейжилеринден тургустунган деткикчилер шиитпирлээн.

Бичии бөлүкте 14, улуг бөлүкте 5 киржикчи болгаш 6 ансамбль бар. "Тыва" ансамбль, удуртукчузу Тываның Улустуң хөөмейжизи Эдуард Дамдын,бөлүктүң артистери Тываның улустуң хөөмейжилери Артур Дамдың-оол, Айдаш Бараңмаа, Тыва Респбликаның культуразының тергиини, Чадаанада уругларның уран чүүл школазының хөөмей башкызы Владимир Куулар хөөмейниң аргаларының, хөгжүм херекселдериниң дугайында делгереңгей тайылбырны кылып, аңгы-аңгы аргалары, хевирлеринге күүселделерни мөөрейниң мурнунда кылгаш, бичии болгаш элээди хөөмейжилерге чедиишкиннерни күзээннер.

Кайгамчыктыг салым-чаяанныг бичии хөөмейжилерниң чалгынналып, «сылдысталып» үнер баштайгы мөөрейиниң түңнелдерин бедик деңнледиг жюри кежигүнери мынчаар түңнээш, тиилекчилер, лауреаттар болгаш дипломантыларны илереткен.

«Хөөмейниң тергиин чыландыктаар күүседикчизи» деп тускай шаңналга Чөөн-Хемчиктен Чоргаар Бегзи, «Хөөмейниң тергиин сыгытчызы» шаңналга Бай-Тайгадан Санчы Куулар, «Тергиин хөөмейжи» деп шаңналга Бажың-Алаактан Эдиски Монгуш, «Тергиин борбаңадыр күүседикчи» деп шаңналды Барыын-Хемчиктен Доржу Наксыл-оолга, «Тергиин эзеңгилээр күүседикчизи» деп тускай шаңналды Чөөн-Хемчиктиң хөөмейжизи Евгений Сааяга тывыскан.

«Хөөмейимни кагбас ла мен» мөөрейниң бөлүктер аразынга Бажың-Алаактың үлегерлиг «Дугай» бөлүү бирги чергениң лауреады болган. Ийиги, үшкү черлерни Бай-Тайганың аас чогаалдың «Оваа» болгаш Чөөн-Хемчиктиң «Кеңгирге» бөлүктеринге тывыскан.

Бирги чергениң дипломантызы Барыын-Хемчик кожууннуң «Мажалык» аас-чогаал бөлүү, ийиги черни Мөңгүн-Тайганың «Мөңгүн-Оваа» болгаш үшкү черни Чөөн-Хемчиктиң «Кеңгирге»аас чогаал бөлүүнүң бичии кижикчилеринге тывыскан.

6-13 харлыг хөөмейжилер аразынга бирги чергениң лауреады атты Чадаанадан Сергек Ооржак чаалап алган. Ийиги, үшкү чергениң лауреаттары Барыын-Хемчиктен Доржу Наксыл-оол, Бай-Тайгадан Доржу Хүрең-оол болганнар. Бирги ийиги, үшкү чергениң дипломантылары Бай-Тайгадан Шойгу Хертек, Барыын-Хемчиктен Начын Кандан, Бай-Тайгадан Санчы Куулар, үшкү черлерни Бажың-Алаактан Салгал Монгуш, Шыдай Монгуш болганнар.

«Хөөмейимни кагбас-ла мен» деп мөөрейниң дээди шаңналын Бажың-Алаактан Аржаан Ховалыгга, бирги чергениң лауреады атты Эдиски Монгушка, ийиги чергениң лауреады Евгений Сааяга, үшкү черни Барыын-Хемчиктен Чиңгис Сааяга тывыскан. Мөңгүн-Тайгадан Айсан Дамбылга бирги чергениң дипломантызы атты тывыскан.