БАЖЫҢ-АЛААКТЫҢ ДЕЛГЕЛГЕЗИНДЕН ЧААГАЙ ШАЙЛАР.

БАЖЫҢ-АЛААКТЫҢ ДЕЛГЕЛГЕЗИНДЕН ЧААГАЙ ШАЙЛАР, ҮНҮШТЕРДЕН ХАНДЫ...

Чадаанага барыын зонаның башкыларының түңнел хуралының программазынга делгелге көргүзүп, кылырын киирген. Өвүрден, Сүт-Хөлден “Салгал” немелде өөредилге төвүнден Алла Быстан-ооловна Ондар, Чимис Бавуужаповна Ооржак өөредилгеде, спортта болгаш коллективини хоочунары, чедиишкиннериниң дугайында солун булуңнарны бараалгаткан.

Бистиң кожуундан Бажың-Алаактың “Хүнчүгеш” уруглар сады хензиг музейни беш аңгы угланыышкынныг кылдыр дерээн. Орус казанак,ооң иштики дериг-херекселдери болгаш бүрүн каасталгазын Ирина Васильевна Самдан удурткан башкылар, ада-иелер, бичии кижизидикчилерниң киржилгези-биле белеткээн. Ажыктыг казымалдар талазы-биле булуңну Юлия Монгалбииевна Сат, тыва чаңчылдар болгаш тыва өгнүң бичиилеткен хевирин, а патриотчу кижизидилге талазы-биле булуңну Лада Наташ-ооловна Ооржак көргүскеннер.

Эм үнүштер болгаш янзы-бүрү оъттар, ылаңгыя шеңне, дыт чөвүрээзи, иван шай болгаш өске-даа оът холуксаалыг шайлар, хандылар, вареньелер, ары-чигири болгаш долгандыр хүрээлелден бойдустуң чайгаар үнүштеринден кылып болурун Розалья Константиновна Ондар тайылбырлааш, бодунуң таныштырылга кичээлин чедимчелиг чоруткан. Хемчег эгелээр мурнунда эртежик келгеш бо башкының хадыыр сарыгның чечээнден кылган чаагай суксунун, аңгы-аңгы вареньелерин амзап, четтирдим. Эх, чаагайын...

Бажың-Алаак - долгандыр арга-арыг-биле хүрээленген. Уруглар садының девискээринге сарыг-сарыг чечектер частып келирге-ле, башкылар уруглар-биле чечектиң бажын чыггаш, каш катап чуп-чуп, улуг эвес отка варенье хайындырып, оон ханды-даа белеткеп ап турарын Чазак даргазының орлакчызы Алик Кертик-оолович Монгуш болгаш Чөөн-Хемчик кожууннуң чагыргазының даргаларынга тайылбырлап чугаалаан.

Чадаанада уруглар болгаш элээдилерниң техниктиг чогаадылга бажыңынга барып турар Чадаананың №3 ортумак школазының өөреникчизи Чойган Сарыглар бичии роботту кылганын тайылбырлааш, ону шалага салып, пульт дузазы-биле херек кырында ажылдадып башкаргаш халдырын көргүстү. Салым-чаяанныг өөреникчивистиң болгаш кожуунувустуң ниити башкыларының чедиишкиннери дээш амы-хууда өөрүп турдум.