Михаил Мурашко Тываның эмнелге ажылдакчыларынга шаңналдарны тывыскан

Михаил Мурашко Тываның эмнелге ажылдакчыларынга шаңналдарны тывыскан

Бөгүн, декабрь 9-та, Россияның кадык камгалал сайыды Михаил Мурашко республиканың кадык камгалал адырының төлээлеринге албан черлериниң шаңналдарын тывыскан. Байырлыг хемчег Тываның Чазаанга болуп эрткен.



“Тываның кадык камгалал адырында чүгле материал-техниктиг талазы эвес, технология системазы база өскерлип турары көскү. Бөгүн шаңналдар тыпсып тургаш, бодунуң адырында тергиидеп турар специалистерге, аныяк эмчилерниң дагдыныкчыларынга болгаш мурнуку одуругда чоруп турар эмнелге ажылдакчыларынга өөрүп четтиргеним илередир-дир мен” – деп, Михаил Мурашко демдеглээн.

Россия Федерациязының Кадык камгалал яамызының “Кадык камгалалының тергиини” хөрек демдээ-биле 1 дугаар республика эмнелгезиниң кезер эмчиниң сестразы Жанна Темир-оол, Республиканың кеш болгаш шээр аарыглар диспансериниң кол фельдшери Ирина Медведева, Республиканың онкология диспансериниң амбулатория-поликлиника албанының лаборант-фельдшери Розалия Нордуп, Тес-Хемниң төп эмнелгезиниң терапевт эмчизи Мария Оюн-Лоозаңмаа, Халдавырлыг аарыглар эмнелгезиниң гепатит салбырының эргелекчизи Марианна Монгуш, Республиканың уругларның катап тургустунулга төвүнүң педиатр эмчизи Алимаа Кадыр-оол олар шаңнатканнар.

Россияның Кадык камгалал яамызының Хүндүлел бижии-биле Бии-Хемниң төп эмнелгезиниң терапевт эмчизи Ирина Шишкованы, ол-ла эмнелгениң фельдшер-лаборантызы Наталья Лясовскаяны, 1 дугаар республика эмнелгезиниң уругларның кезер эмчизи Чойгана Сааяны, Онкология диспансериниң реанимация болгаш интенсивтиг терапия салбырының эмчи сестразы Роланда Кууларны, Консультация-диагностиктиг төптүң тускай терапия салбырының эндокринолог эмчиниң сестразы Уянмаа Кууларны, Дүрген дуза болгаш айыыл-халап медициназының дүрген дуза чедирер эмчизи Антон Капустинни шаңнаан.

Буян Ооржактың тырттырган чуруктары