МОСКВАГА УШУ БОЛГАШ КУНГФУ

МОСКВАГА УШУ БОЛГАШ КУНГФУ

ФЕСТИВАЛЫНГА

Москвага октябрь 4-5 хүннеринде Бүгү-Российжи «Конфуцийниң кубогу» деп кыдат национал спорт болгаш уран-чүүлдүң ушу болгаш кунгфу фестивалы болуп эрткен. Анаа 20 командадан 300 аңгы-аңгы назы харлыг спортчулар киришкен.

Ушу программазының конкурс болгаш маргылдаалыг хевиринге Тываның Ушу федерациязының Президентизи Роберт Александрович Күнзектиң удурткан командазындан 10 киржикчи чедиишкиннерлиг болган. Кубок болгаш дипломнарны тиилекчилерге Россияның ушу федерациязының Президентизи Глеб Николаевич Музруков тывыскан.

Чөөн-Хемчик кожуунну төлээлеп «Лотос» командазы, капитаны Анна Бекаевна Кара-Сал, Чөөн-Хемчик кожууннуң муниципалдар аразында эмнелге төвүнден Алла Шаалыйевна Содунам, Ольга Удайбановна Монгуш, Анджела Кууларовна Монгуш, сайгарлыкчы Татьяна Комбуевна Ооржак шаолиньцюань 24 комлекстин бурун мергежилгелерин чазыг-даа чок чараш шимчээшкиннер-биле куусеткеннер.

Команданы «аарыкчы» кылдыр Наталья Мочекпеновна Ооржак, Тамара Содунамовна Монгуш, Айсуу Каадыр-ооловна Сат, Ачымак Алдын-ооловна Монгуш деткип, Россия чергелиг улуг маргылдааның болуп эрткен ушунун спортчу өргээзинге чедип келгеннер.

Кызыл, Чадаана командалары каттыжып алгаш тайцзицюань 24, веер (челбииш) деп комплекстин нарын мергежилгелерин көргүскеш, хоочуннар аразынга фестивальдың үшкү шаңналдыг черин кубок-биле катай чаалап алганнар.

Тываның Баштыны Владислав Товарищтаевич Ховалыгның айтыышкыны-биле Тыва Республикада Кадыкшыл чылын 2024 чылда чарлаан. Чадаананың хоочун спортчуларындан улуг назылыы 67 харлыг деп санап турар. Конфуцийнин салгакчыларынын мерген угааны чугле Кыдаттыы эвес, а бүдүн сайзырангай делегейниң байлаа деп үнелеттинер.

— Бо маргылдаага киржиривиске материалдыг болгаш моральдыг дуза каткан деткикчилеривиске өөрүп четтиргенивисти илереттивис-деп, команданың капитаны Анна Кара-Сал илередип турар.

Ушу чугле спорт эвес, а кижиниң кадыкшылы, онзагай уран-чүүл, культура. А бисте кандыг-даа спорттуң хевирлеринге белеткел эртирериниң таарымчалыг бүгү-ле байдалдары бар: Арыг агаарывыс, долгандыр хүрээлеливис, аржаан сугларывыс агып чыдар. Күзелдиг кижилерни Ушуну өөренип алырын сүмелеп тур бис!