Вячеслав Монгуш

Вячеслав Монгуш

Бүгү-делегейниң Чогаалчылар хүнүнде Тываның Чогаалчылар Эвилелиниң кежигүннери Кызылда күрүне филармониязынга байырлыг чыышты эрттирген. Мурнуку чылдарда калбак номчукчуларга билдинмес, чогаадыкчы "үүжезин" хаптап алгаш, салым-чаяаның чажырып чораан чогаалчылар Тываның аңгы-аңгы булуңнарындан илереп келгеннер. Эрткен 2023 чылдың дургузунда Тывага аныяк чогаалчыларның делегей чергелиг семинарны найысылалга эрттиргеннер. Москвадан, Якутия, Хакасиядан чогаалчылар келгеш, байлак арга-дуржулгазын дамчыдып берип, Россияның төп парлалгазынга, ылаңгыя " Литературная газета" солунга хоочун, аныяк-даа чогаалчыларның шүлүктерин, чогаалдарын орус дылче очулдургаш, номнар, тускай чыындылар кылдыр үндүргени улуг чедиишкин. Амгы үеде чогаалчылар Эвилелинде 128 аңгы-аңгы назы-харлыг кижи бар. Ниитизи-биле 38 ном чырыкче үнген. Оларның аразындан Дегут Демчик Монгушович "Көшкелер кыйгызы" деп номну тыва, англи, орус дылдарда парлаткан. Сонеттер, рубаилер, танка, хокку, илиглерден тургустунган шүлүктер номунуң автору Юрий Кыргысович Туң-оол " Авамның булуду" деп номну, Чадаананың №2 ортумак школазынга башкылап турган, амгы үеде амыдыралының аайы-биле Кызыл кожуунда чурттай берген, " Бора-Булак сырыны" чечен чогаал каттыжыышкынның киржикчизи Чаяна Чадамбаевна Шилова, " Салым- чолдуң сылдызы", Кашпал оглу деп чогаадыкчы аттыг авторнуң " Чаалыг шөлден чагаалар", хоочун башкы Раиса Оңчатпановна Ондар "Чуртталга аас-кежик-тир!” , Дарыймаа Окпан-ооловна Ооржак "Мөнгүн чинчим" , Нина Түлүшовна Эртине "Чаяалганың хайыразы" деп номну, Тахир Түлүшович Мекпер-оол "Ногаан чыланның хоразы" деп арагалаашкынның чидиг темазын фэнтези жанрынга болгаш тоолчургу, чечен чугаалар колдаан номну, Тес-Хемден Чагар-оол Дорун-оол Кузьмаевич баштак шүлүктернин "Көрүнчүк" деп номнары чырыкче үнгени, 10 чогаалчы Россияның Чогаалчылар Эвилелиниң кежигүнүнге киргени - улуг чедиишкин болур. Байырлыг чыышка аныяк, улуг-даа назылыг чогаалчыларны Тываның Чогаалчылар Эвилелиниң кежигүнүнге хүлээп ап, суй-белектерни тывыскан. Тываның Улустуң чогаалчызы Черлиг-оол Чашкынмаевич Куулар сөс алгаш, бодунуң байлак арга-дуржулгазын аныяк, эгелеп чоруур чогаалчыларга дамчыдып, байыр чедиргеш, автор бодунуң шүлүктеринге ырларны күүсеткен. Тыва дыл, чогаал дээш сагыш аарып чоруур Кызылдың № 9 школа-гимназиязының тыва дыл башкылары, 2 композитор чыышка киришкен.