Вячеслав Монгуш

Вячеслав Монгуш

Ном санының амыдыралындан

МААДЫРЛЫГ ЭМЧИ-БИЛЕ УЖУРАЖЫЛГА

Азияна Монгуш, Чөөн-Хемчик кожууннуң төпчүткен библиотека системазының библиогравы

Декабрь 7-де, Чадаананың төп ном саңынга Россияның Маадырлар хүнүнге тураскаадып солун, онзагай ужуражылганы эрттирген. Ужуражылгага номчукчулар болгаш Чадаананың № 1, 2 ортумак школаларының өөреникчилери, Тываның Чадаанада технологтуг техникумунуң сургуулдары база чалаттырган аалчылар—Монгуш Айдың Буянович – Чөөн-Хемчик кожууннуң культура сайзырал төвүнүң массалыг хемчеглер талазы-биле специализи, Монгуш Ангелина – культура сайзырал төвүнүң специализи, Монгуш Вячеслав Николаевич – «Чаа орук» солунунуң кол редактору киришкеннер.

Ужуражылганы ном саңының чурт-шинчилел салбырының эргелекчизи Кара-Сал Эльвира Артуровна башкарып эрттирген.

Хемчегниң кол маадыры, Чөөн-Хемчик кожууннуң төп эмнелгезиниң Чадаана хоорайда кезер эмчи салбырының эмчизи, Украинада Россияның чорудуп турары тускай шериг операциязының киржикчизи Сат Артыш Хирлиг-оолович болган. Артыш Хирлиг-оолович ужуражылга үезинде бодун чыглып келген өөреникчилерге, аалчыларга таныштырып, ада-чуртун, арат-чонун камгалажып, уйгу-дыжын, амы-тынын харамнанмайн неонацизимге удур тулчуп, кезер эмчиниң хүлээлгезин маадырлыы - биле күүседип, Улуг чурттувус Россияның балыгланган дайынчыларынга бодунуң дузазын кадып камгалап чораанын келген аалчыларга таныштырып чугаалаан. Хары черге ажылдаарга эмчилерге өөрүнчүг, муңгаранчыг, дүвүренчиг, коргунчуг-даа таварылгаларның турганын келгеннерге сагындырып чугаалады. Улуг идегел-биле бистиң чурттувус Россияның киржилгези-биле болуп турар тускайлаттынган шериг операциязынга шынныг чорук тиилеп алырын, бүзүрелдии - биле сеткилиниң ханызындан чугаалады. Төөгүлүг ужуражылгага олурганнар Артыш Сат- биле чөпшээрежип, өөрүп турганнар. Солун ужуражылга-биле чергелештир ном саңының ажылдакчылары номнар делгелгезин «Вера Байлак - улуг дайынның бичии дайынчызы», «Тыва Ада-чурт дайынының үезинде» деп презентация-таныштырылгаларны тайылбырлап көргүскеннер.

Ужуражылга хемчегни түңнеп, ном саңының директору Ирина Рудольфовна Скорых дайынчы эмчи Артыш Хириг-ооловичиге четтиргенин илередип өөрүп четтириишкинниң бижиин тутсуп, чыылганнарның мурнундан аас-кежикти, быжыг кадыкшылды күзээн.